Thla li chhungin exam buatsaih theih a ni lo: CBSE
Supreme Court chuan All India Pre Medical Test (AIPMT) examination May 5-a neihah question putru a awm avanga exam hi cancel a, thla li chhunga exam buatsaih ṭha leh tura a hriattirna chu Central Board of Secondary Education (CBSE) chuan thil theih a ni lo, a ti.
CBSE hian pre-medical exam buatsaih ṭhatna atan hian hun pekbelh turin Supreme court-ah a ngen a, a ngenna hi court chuan a ngaihtuah sak ang.
May 5-a AIPMT exam neih hi June 5 khan a result puan tur a ni a, mahse exam dawn hian centre hrang hrangah zirlai 700 velin an mobile phone aṭangin question leh answer key-te an dawng a, hei vang hian exam neih tak hi cancel a ni. Exam cancel a nih avang hian MBBS zirtuma beitu, zirlai nuai 6.3-te dinhmun chu tihchian theih lohin a la awm phah a ni.
Vacation bench chuan Haryana Police-te hnenah exam zawhna putru chhawrtu zirlai eng zat nge an ni tih report thehlut turin a hriattir tawh a, hei bakah han zirlaite hi hriatchhuah tum turin police-te a ngen bawk.
AIPMT exam zawhna putru hi 123 niin a answer key nen veka thawndarh a ni a, hei hi mobile phone 75 hmangin Bihar, Jharkhand, Rajasthan leh Haryana-ahte thehdarh a ni.
CBSE chuan Supreme Court-in exam buatsaih tawh cancel a, thla li chhunga a thara buatsaih leh tura a hriattirna chu thil harsa tak a nih tur thu a lo sawi tawh. Kumin May 5-a exam buatsaih tur khan nikum October thla aṭangin an inbuatsaih ṭan tih sawiin, hun a duh rei hle tih an sawi. Hei bakah hian dik lo taka thiltihnaah hian a bultumtu tak chu zirlai 44 chauh a nih thu sawiin, heng mite vanga zirlai nuai 6 chuangte harsatna siam sak a, exam ṭhat tir leh chu an duh loh thu a lo sawi tawh bawk.