Univeristy record-ah Tomar hming a awm lo Irani degree chhuichian phut

Delhi Law Minister hlui, Jitender Singh Tomar-a'n law degree a neihna nia a sawi, Jhansi, Bihar-a Bundelkhand University academic record chu enfiah a ni a, a hming a awm lo.

University chuan AAP MLA To­mar-a hming hi an record-ah a chuang lo tih investigator-te an hrilh.

Nilaini khan Delhi Police-te chuan Bundelkhand University hi tlawhin, darkar nga chhung record hrang hrangte an endik a, Tomar pawh hi an hruai tel a ni. University registrar-in lehkha zir tura an university a kal hun a zawh chuan, AAP hruaitu Tomar hian Jhansi-a a kal ṭum khatna a nih thu a hrilh.

Bar Council of Delhi-in Bihar college aṭanga degree lem nei nia puha Tomar-a laka complain an thehluh hnuin, June 9 khan AAP hruaitu hi man a ni. Law degree bakah, BSc degree a neih pawh a lem nia puh a ni bawk.

Hetihlai hian NDA sorkara Human Resources Development Minister Smirti Irani pawh a educational qualification a tarlanah thil dik tawk lo a awm nia puh a ni. Prime Minister Narendra Modi-a nau, Prahlad chuan Delhi Law Minister hlui chhui a nih ang bawkin, Irani pawh hi a degree neih dante chhui chian a phut thu a sawi.

All India Fair Price Shop Dealers' Federation (AIFPSDF) vice presi­dent, Prahlad chuan chanchin thar lakhawmtute'n an kawmnaah he thu hi a sawi a ni. A hmain Congress leh AAP pawhin Irani hi educational qualification dik lo taka tarlangah puhin, chhui chiang turin an lo phut tawh bawk.