India ramah emergency puan a ni leh thei: LK Advani

BJP hruaitu hlun, LK Advani chuan India ramah emergency puan hun a thleng thei tih a sawi.

Indian Express-in a kawmnaah, Advani chuan, "Poltical hruaitute hi an puitling lo ka tihna a ni lo. Mahse emergency hi a thleng tawh lo ang tih tawp erawh ka sawi ngam lo a ni," tiin India ram political system chu a ring ngam tawh lo tih a sawi. Hruaitute zingah democracy leh a kaih­hnawih thil pawi­mawh te tipuitling tura inpekna tak tak a tlem tih sawiin, Advani chuan demcoracy tihchhe thei thilte chu an chak sawt hle a ni, a ti.

Advani chuan kum 1975-a India rama emer­­gency puan a nih chung­chang sawi­chhuak­in, hetih­lai hian ram danpui chu ṭha taka hum­halh a ni chungin Prime Minister Indira Gandhi khan emergency chu a puang tho a ni, a ti. "Kum 2015-ah hian dan­pui humhimna hi a ṭha tawk lo a ni," a ti.

Central-a rorellai, BJP hruaitu hlunin emergency chungchang a sawi hi Prime Minister Narendra Modi-a kaihhruai NDA sorkar tana thil zahthlak tak anga ngaih a ni.

Aam Aadmi Party (AAP) chuan Advani thu­sawi hi Modi-a beihna remchang atan a hmang nghal a, AAP hruaitu Ashutosh chuan, "Advani thusawi hian Modi a rintawk lohzia a tilang chiang hle a ni. He thil hian LK Advani-a'n a blog-a PM candidate atana Modi thlan a nih ṭuma dictatorship lutuk leh Hitler ang mai nia a sawi chungchang min hriat­chhuah tir a ni. Advani hian Modi leh a kaih­hruai sorkar hi a ring tawk tawh lo tih a lantir a ni," a ti.

Congress thupuangtu Tom Vadakkan pawhin BJP hruaitu hlun Advani chuan PM Modi chu a ring zo tawh lo a ni, a ti bawk.