Lalit Modi chungchangah PM hi ṭawngchhuak tawh rawh se: Congress

Dan bawhchhia leh sum tichingpena puh, Indian Premier League (IPL) hotu hlui Lalit Modi-a ṭanpuia puh, BJP hruaitu pahnih- External Affairs Minister Sushma Swaraj-i leh Rajasthan Chief Minister Vasundhara Raje-i te chungchangah Congress chuan Prime Minister Narendra Modi chu ṭawngchhuak turin a phut.

Sum tam tak tichingpen puh a nih avang leh, dan a palzut avangin UPA sorkar lai khan Lalit Modi hi thubuai eng emaw zat siamsak a ni a, a passport pawh laksak a ni bawk. Mahse Minister Swaraj-i leh Rajasthan CM Raje-i te hian Portugal-a a zin theihna turin Britain thuneitute hnena travel document a dilna leh Britain-a pem luh a dilnaah an lo ṭanpui a ni.

PM Modi hian Lalit Modi-a chungchanga BJP hruaitu pahnihte inrawlh avanga beih an tawh mek chungchangah nimin khan Union Home Minister Rajnath Singh a hmu. Modi leh Singh-te hian eptute'n an beih mek dante an sawi bakah, Supreme Court hnenah Lalit Modi-a pass pekir leh tura sorkar laipuiin ngensak a tum chungchangte an sawidun nia report a ni. Mahse tun thlengin PM Modi hi Sushma-i chungchangah a la ṭawng chhuak lo a, hei hi eptute chuan ngai mawhin, PM chu a minister chet dan chungchangah hian ṭawngchhuak ngei turin an phut.

Sorkar laipui leh BJP chuan Sushma Swaraj-i hi an thlawp chhunzawm zel a, Rajasthan CM Raje-i chungchangah erawh aw an la chhuah lo.