Delhi CM Atishi-i'n crowdfunding campaign hawng

Delhi chief minister, assembly inthlan lo awm tura Kalakji seat-a Aam Aadmi Party (AAP) candidate ni bawk, Atishi chu nimin Pathianni khan inthlan neih tur atana crowdfunding campaign a buatsaih chu a hawng. Atishi chuan Delhi mipuite chuan an party hnathawh leh dik taka politics a kalpui dan chu mipuiin an thlawp ngei a beisei thu a sawi.

Delhi-a press conference-a neihah Atishi chuan mipuiten sum an thawh theihna tur online link tarlangin, inthlan neih tur atan hian Rs nuai 40 vel a mamawh tih a sawi. AAP chuan mipuiten sum tlem te te an thawh khawm hmangin inthlan hi an hmachhawn ṭhin tih sawiin, he hian dik leh rinawm taka politics an kalpuina kawngah a pui a ni, a ti. Atishi chuan, “Kum 5 kalta chhung khan MLA, minister leh tunah chuan Delhi Chief Minister angin ka bulah in ding a ni. In malsawmna leh in thlawpna tel lo chuan heng zawng zawng hi ka thleng thei lo," tiin X-ah a tarlang. “Hmeichhe kum la naupang tak leh lehkhathiam ka nih angin, in mi rin ngamna leh in thilpekte hmang hian politics lama hnathawh tur ka ngaihtuah thei a - chu chu keimah chauhin ka zawh theih loh kawng a ni. Tunah chuan inthlan campaign dang kan hmachhawn mek avangin in thlawpna ka mamawh leh ta a ni,” a ti bawk.

Nikum December thla khan Jangpur aṭanga AAP candidate, Manish Sisodia chuan inthlan neih tur atan hian crowfunding platform a lo hawng tawh bawk.

Delhi assembly seat 70-ah February 5 hian inthlan neih a ni dawn a, February 8-ah vote tla chhiarin result puan a ni ang.

Kum 2015 assembly inthlanah hian AAP hian seat 67-ah lain, kum 2020 inthlanah khan seat 62 an la bawk. Kumin inthlanah pawh a zawna a term thumna atana sorkarna siam ngei tumin ṭan an la a ni. BJP chuan 2015-ah seat thum lain, 2020-ah seat riat an la a, Congress party erawh an artelukawn thung.

INDIA bloc hnuaiah AAP leh Congress hi tel mah se Delhi assembly inthlanah erawh an thawk dun dawn lo a, party malin an chuh ve ve dawn a ni.