Republic Day-ah khuallian tur Indonesia President

Indonesia president Prabowo Subianto chu January 26-a Delhi khawpuia Republic Day lawmnaah khuallian a ni dawn nia sawi a ni a, official erawh chuan puan a la ni lo.

Kum 73 mi, Subianto hi army general hlui niin, kum 2024 October thla khan Indonesia President atan lak luh a ni. Republic Day hmanpuia India rama a cham chhungin, prime minister Narendra Modi nen pawh inbiakna an nei zui nghal dawn a ni.

India hian Republic Day lawmnaa khuallian tur hian ram dang hruaitute a sawm ṭhin. Nikum khan France president Emmanuel Macron chu khuallian niin, kum 2023 khan Egypt president Abdel Fattah El-Sisi chu khuallian a ni bawk. Mahse Covid-19 hri leng vangin kum 2021 leh 2022 khan khuallian tura sawm a nei lo thung. Kum 2018 khan ASEAN member ram 10 hruiatute chu khuallian an ni. Khuallian atana sawm tawh zingah hian Brazil president hlui Jair Bolsonaro, South Africa president hlui Cyril Ramaphosa, Abu Dhabi crown prince Sheikh Mohamed bin Zayed Al Nahyan te pawh an tel.

Republic Day lawmna pui ber, Delhi-a neih tur atan hian venhimna lam pawh uluk taka ruahman chhoh mek a ni. Venhim hna thawk tur hian Delhi-ah paramilitary unit 50 chuang dah an ni dawn a, anni bakah police 5,000 chuang an duty bawk ang. Delhi police-te pawhin kar liam ta khan inter-state coordination meeting buatsaihin, law enforcement agency hrang hrangte chu venhimna kalpui dan tura ruahmannate an sawipui. He meeting hi Delhi police commissioner Sanjay Arora-a'n kaihruaiin Haryana, Punjab, Uttar Pradesh, Madhya Pradesh, Jharkhand, Uttarakhand, Bihar, Rajasthan, Chandigarh, leh Jammu and Kashmir aṭangin senior police officer-te an tel a ni.

January 19-26 chhung hian Delhi-a Indira Gandhi International Aiport (IGI) pawhnitin minute 145 chhung khar a ni ṭhin dawn a, hei hi venhimna kalpuina tura inbuatsaihna atana tih niin, flight 1,300 chuang a nghawng dawn a ni. Airport khar hun hi zing dar 10:20 aṭanga chhun dar 12:24 chhung a ni ang.