Delhi : Congress-in hna nei lote pawisa pe dawn

Congress chuan February 5-a Delhi inthlanpui 2025-a an au hla tur an puang a, thuneihna changa an tling a nih chuan ṭhalai lehkha thiam hna nei lote hnenah thla tin Rs 8,500 pek an tiam. Heihi a hming atan 'freebie' emaw 'revdi' emaw hming an vuah a, Congress hi an tling a nih chuan an intiamna hi an tihhlawhtling ngei tur thu a sawi a ni.

Congress chuan thla tin stipend hi 'ṭhalai lehkha thiam hna nei lote' hnenah kum khat chhung chauh a pe dawn a. Sum lama ṭanpuina hi 'Yuva Udaan Yojana' tih scheme hnuaiah pek a ni dawn a, a thlawna pek a ni lo tih AICC general secretary Sachin Pilot chuan a sawi.

Sum leh paia ṭanpuina Rs 8,500 chu company, factory emaw, pawl emawa an thiamna lantir thei ṭhalaite hnenah pek a ni dawn tih Sachin Pilot chuan a puang a. Heng factory emaw company emaw hian ṭhalaite hnenah pawisa hi an pe dawn niin a tarlang.

Hun engemaw chen kalta khan AAP pawhin, Mahila Samman Yojana hnuaiah Delhi-a hmeichhe vote nei registered te tan thla tin Rs 2,100 ṭanpuina an pe dawn tih an lo puang tawh bawk. Hmeichhia te sum lama tanpuina bakah hian rorel lai party chuan kum upa lamte tan a thlawna healthcare scheme a duang bawk.