Lok Sabha-in GST Bill pawm

Goods and Services Tax (GST) lakna tur, Constitution Amendment Bill chu Thawhṭanni khan Lok Sabha member-ten an pawm. He bill hi India tax reform lian ber tur nia ngaih a ni.

GST Bill hi nikum May thla khan Lok Sabha hian a lo pawm tawh a, mahse Rajya Sabha-ah a tlang thei loh avangin hun rei tak tihkhawtlai a ni. Hei vang hian eptu lamten an duh anga ṭhenkhat siamṭhat a nih hnuin, kar hmasa khan Rajya Sabah chuan Constitution (122nd Amendment) Bill, 2014 tiin a pass thei ta a ni.

Thawhṭanni-a Lok Sabha-a bill siamṭhat pharhnaah hian member 443 ten an thlawp a, a thlawp lo lamah vote an awm lo. AIADMK member-te chu vote lak hmain House
aṭangin an chhuak a. A hmaa Rajya Sabha-a ngaihtuah a nih pawhin vote thlak loin an lo chhuak tawh bawk.

GST Bill thar hi AIADMK tih loh party dangten an thlawp vek a, mahse sorkar laipui chu GST hian thil man leh service man a tihpun phah dawn lo tih tiam turin an phut a ni.

Prime Minister Narendra Modi leh Union Finance Minister Arun Jaitley-te chuan party hrang hrangte hnenah Constitution Amendment Bill an pawmpui chu lawmthu an hrilh a, PM chuan, "GST hi party emaw sorkar in hnehna a channa anga ngaih tur a ni lo. India rama democracy leh mitinten hnehna kan chan lantirna a ni zawk" a ti. Bill chu siamṭhat a nih hnuah party hrang hrangte chuan an kalphung in an lohnate dahṭhain, lungrual takin an pass thei ta a ni, a ti. Rajya Sabha-ah hun rei tak tihkhawtlai ni mah se, a tawpah chuan party zawng zawngten an thlawp thei ta a ni, a tibawk.

Chhiah lak dan thar siam chuan ram≠chhunga dik lo taka chhiah lak ṭhinte a titawp ang a, sumdawngten dik lo taka thil an tih thinte pawh a tawp phah dawn a ni, a ti. He bill thar hnuaiah hian consumer-te chu lalber an ni tawh dawn tih a sawi.

Lok Sabha-a GST bill chungchang sawihonaah hian SP hruaitu Dharmendra Yadav leh Congress hruiatute Mallikarjun Kharge-te pawhin thu an sawi a, Congress kaihhruai UPA sorkar laia bill pass an tum lai, Gujarat Chief Minister a nih laia Narendra Modi-an he bill a dodal tlat chhante an zawt let. Modi chuan kum 2011-a House-a GST bill pharh hmasak ber a nih khan a hrechiang tawk lo a, hei vang hian hetihlai a Finance Minister Pranab Mukherjee pawh vawi tam tak a bia niin a sawi. Kharge chuan he bill chungchang hi BJP chuan lo ngaihsak deuh ni se, Congress sorkar lai khan pass a ni daih tawh ang tiin, a ti tangkhangtu chu BJP an nih thu a sawi bawk.