Mumbai-ah ruahsur nasa vangin nunphung a khaihlak

Ningani zan aṭang khan Mumbai khawpuiah nasa takin ruah a sur a, mipuite chu pawn chhuak tam lo tura ngen an nih bakah nimin khan khawpui chhunga school te pawh khar an ni.

Ruahsur nasa vang hian Central Railway line-a Chhatrapati Shivaji Terminus (CST) leh Kurla inkara rel service chu tihtawp lailawk a ni. Relkawngah tui a tling nasa a, hei vang hian service pawh a tihkhaihlak phah hle. State dang aṭanga Mumbai pana tlan rel eng emaw zat pawh station hrang hrangah an chawlh lailawk a ngai a ni.

Western Railways chuan thuchhuah siamin, emergency ah chauh rel hmanga turin mipuite a ngen.

Mumbai aṭanga thlawhtheihna chhuak leh lut turte pawh ruahsur avang hian tihkhawtlai a ni bawk.

Ruahsur nasa vangin hmun hniam lam, Parel leh Matunga-ahte khawlaia tui a tling nasa a, chenna in tam tak pawh tui hian a chim a ni.

School khar a nih bakah, nimin khan Mumbai University hnuaia college hrang hrangte chuan exam an neihte an ṭhulh bawk.

Mumbai Mayor Snehal Ambekar chuan khawpui chhunga tuitlingte paih turin pump 100 chuang hman a ni tih a sawi. Hetihlai hian MeT department chuan ruah hi a la sur chhunzawm dawn tih a sawi.

Chief Minister Devendra Fadnavis chuan mipuite chu fimkhur tura chahin, tuipui hnaih lama kal lo turin a ngen. Defence Ministry chuan Indian Navy-te chuan Mumbai khawpui chhung hmun hrang hrangah rescue team an dah a, anni hian a ṭul huna thawk chhuak turin tuilut thiam leh lawngte pawh an inchhawp vek tih a sawi bawk.