Lalit Modi Phuba lak nan Pranab Mukherjee-an min chhuitir

Indian Premier League (IPL) hotu hlui, Lalit Modi-a chuan IPL kaihhnawiha sum tam tak tichingpena puh a ni leh, a mimal pawisa thawnkual dan Enforcement Directorate-in a chhuina chhan chu President Pranab Mukherjee-an thu a pek vang niin a sawi.

ED-in Lalit Modi a chhui ṭan lai, kum 2010 khan Mukherjee hi UPA sorkar term hnihnaah finance minister a ni.

Lalit Modi hian a chungchang chhuina thupek tihchhuah a nih veleh, India chhuahsanin United Kingdom a pan nghal a, tun thlengin a la khawsa zui a ni.

Modi chuan Kochi IPL franchise buainaa Union Minister hlui leh Congress hruaitu Sashi Tharoor inhnamhnawih dan a puanzar avangin phuba lakna atan Mukherjee chuan amah chu chhui turin a ti ta niin a sawi.

IPL hotu hlui hian Congress minis­ter hlui pathum - Shashi Tharoor, P Chidambaram leh Salman Khurshid-te chuan UK-a a khawsak theihna tur pawh tihbuaisak an tum niin a sawi. A hma pawhin Chidambaram chu a laka thubuai siamnaa mawhphurtuah a lo puh tawh bawk.

Congress party chuan Lalit Modi-a hi nimin khan chhang let nghalin, phuba lak tuma Mukherjee a puh dan chu demawm an tih thu an sawi a, a chungthu hi ngaihtuah a nih theihna tura India rama hruai kir ngei turin sorkar laipui an phut.

Congress thupuangtu, Meem Afzal chuan, 'President puh a nih dan hi a demawm hle. Sorkar laipui hian Lalit Modi hruai kir tum hian eng angin nge hma a lak? Engvangin nge tun thlenga red corner notice tihchhuah a la nih loh?' tiin, Lalit Modi-a hnena passport pek cancel sak tura sorkarin Supreme Court a ngen lohna chu sawifiah turin a phut bawk.

Afzal chuan Modi-a tana British thuneitute hnena travel document dilpuitu, BJP hruaitu pahnih External Affairs Minister Sushma Swaraj-i leh Rajasthan Chief Minister Vasundhara Raje-te chungchanga Prime Minister Narendra Modi leh BJP kaihruai sorkar a la ngawi reng chu a dem thu a sawi. PM Modi leh a kaihhruai sorkar chuan dan bawhchhetu, Lalit Modi-a ṭan­puitute chu hum a tum a ni, a ti.