Emergency chungchangah Advani a insawifiah

BJP hruaitu hlun, LK Advani-an India ramah emergency puan a ni leh thei tia a sawi chu eptuten Prime Minister Narendra Modi leh a kaihhruai NDA sorkar beihna remchangah an hmang nasa hle. Advani thusawi hian Modi a rinngam lohzia a tilang chiang hle a ni, an ti.

Advani chuan nimin khan a thusawi chungchang hi sawifiahin, 'Emergency chungchang ka sawina a ni mai a, tunah hian kan ramah hman a ngai ang ka tihna a ni lo. Modi-a sorkar hnuaiah hian emergency puan hlauhthawnna tur a awm lo' tiin a sawi.

Hetihlai hian eptute chuan Advani thusawi hi an la sawi chhunzawm reng a, Delhi Chief Minister Arvind Kejriwal-a chuan, 'Advani-an emergency puan a ni lo ang tih sawi theih a ni lo tia sawi hi a dik chiah a ni. Sorkar laipui hian Delhi hi a bul ṭanna atan hman a tum em ni?' tiin a sawi. Sorkar laipui hi Delhi sokar inrelbawlnaah a inrawlh avangin sorkar pahnihte inkar boruak hi tunlai hian a ṭha lo hle.

BJP chuan Advani thlavang hi hauhin, mimal kawh bik neia sawi a ni loh thu an tarlang. BJP thupuangtu chuan, 'Advani hian mimal tihchhan neia sawi a ni lo a, emergency chungchang a sawina mai a ni. A ngaihdan hi ka zah a, mahse mimal takin kan ramah hian emergency puan a ngaih leh ka ring tawh lo. Khatiang hun kha chu kan pel tawh a, India ram democracy hi a chak ṭha tawk a, a chak belh zel zawk a ni' a ti.