IT-in AAP MLA chenna in dap

Income Tax Department-in Delhi-a rorellai, Aam Aadmi Party (AAP) MLA Kartar Singh Tanwar chenna in an dap a, thil hlu cheng vaibelchhe 130 chuang hu an man.

AAP chuan IT department thiltih dan chu an dem thu sawiin, hei hi BJP kaihhruai NDA sokarin an party mi leh sate an laka phuba lak a tumna kawng khat niin a sawi.

Mahse Minister of State for Finance Arjun Ram Meghwal chuan AAP puhna chu thu dik lo a ni tiin, roreltu pawh ni se dik lo taka thiltite chuan dan rorelna an hmachhawn a ngai a ni, a ti. Sorkar laipui chu phuba la zawnga che chi a nih loh thu a sawi a, mimal huat tumah a nei lo a ni, a ti.

IT department hian Tanwar-a chenna leh a office bakah, a unaupa Chattar Singh leh a sumdawnpui pahnihte in pawh an dap bawk nia sawi a ni.

Tanwar hi Chattarpu, Fatehpur Beri leh Mehrauli-a a ram leh shopping complex aṭanga a sum lakluhte chu a thukru nia puh a ni. July 27 khan a chenna in leh a office hi dap a ni. Tanwar leh a thurualpuite hian ram lei leh in sakna aṭanga an sum hmukh te chu annual return-ah an tarlang lo a, an sum lakluh dan hian an sawilang lo a ni. IT official-te chuan document pawimawh eng emaw zat an man a, hengte hi ram neitu an nihna lehkha, legal registration format pangngai a ni lo a, attorney thuneihna hmanga ziahsakte a ni.

Tlereuh leh pawisa fai eng emaw zat an man tel a, an pawisa man zat hi tarlan a ni lo.

An puhna chu thu dik lo a nih thu sawiin, Kartar Singh chuan IT department-ah an thil neih zat leh tax return zawng zawng a thehlut vek tih a sawi. "An hnena ka hrilh loh ram leh hmun ka nei nia an sawi hi a chhan ka hrethiam lo. IT department hnenah ka thil neih zat kimchang taka ka thehluh bakah, inthlan dawnin ka election affidavit-ah pawh ka tarlang vek a ni" a ti.

Kum 2015 assembly inthlan dawna Election Commission-a affidavit a thehluha a lan danin, Tanwar-a thil neih hlut zawng hi cheng vaibel≠chhe 17.65 hu a ni.