Duterte-a'n martial law hmanah vau

Philippine President Rodrigo Duterte chuan an rama ruihhlo tihrem tuma beihpui an thlak meknaah judiciary lam an inrawlh a nih chuan sipai rorelna dan, martial law puanah a vau.

President Duterte kaihhruai sorkar a din hnua ruihhlo do beihpui thlaknaah hian ruihhlo hmanga sumdawnnaa inhnamhnawih mi 500 chuang thah an ni tawh a ni. Ruihhlo hmanga sumdawnnaa inhnamhnawih police official leh judge hming eng emaw zat a puang bawk. Hei vang hiang Thawhṭanni khan Chif Justice Lourdes Sereno chuan President hi lehkha thawnin, court chauhin judge-te chungthu hi a ngaihtuah thei a ni tih a hrilh. Hei hi President chuan Thawhlehni-a Mindanao thliarkara sipaite hmaa thu a sawinaah a chhang let a ni.

Duterte chuan, "Kan beihpui thlak mek min dodal a, min dan an tum zel a nih chuan martial law ka puan mai an duh zawk tihna em ni?" a ti. An ram mipuite chu ruihhlo ngawlvei avangin tam tak an thi a, ruihhlo vang vekin hmeichhia leh naupang kum tling loten pawngsual an tawh phah bawk a, hetiang thil a thleng ṭhin hi a pawi a ti takzet tih a sawi. Hei vang hian judiciary lam chu beihpui an thlak meknaah harsatna siam lo turin a ngen.

President hnena lehkha a thawnah, Chief Justice chuan President-in ruihhloin Philippine mipui≠te leh chhungkaw nun a tichhe nasa tih a sawi chu a ṭawmpui thu a sawi a, hetihlai hian mipui hmaa judge rinhlelhte hming chu puanzar a nih hmain dan ang taka kalpui phawt a ngai a ni, a ti. Judge-te pawh chu ruihhlo zuarten an bitum fo tih sawiin, kum 1999 aṭang khan ruih≠hloa sumdawngte kut tuara thi, judge 26 an awm tawh a ni, a ti.

Philippines ramah hian martial rule hman a lo ni tawh a, kum 1972 kha khatih laia President Ferdinand Marcos chuan martial law puangin thuneihna a pumhmawm a, mahse kum 1986 khan a thuneihna aṭangin paihthlak a ni.