MHA-in Kejriwal leh Sisodia thubuai siamsak remti

Union Ministry of Home Affairs (MHA) chuan Enforcement Directorate (ED) chu Delhi chief minister hlui Arvind Kejriwal leh a deputy hlui Manish Sisodia te lakah, Prevention of Money Laundering Act tlawh chhana excise policy kaihhnawiha thubuai an siam a remtih sak.

Thla khat liam taah khan Delhi Lt Governor VK Sixena chuan ED-in excise policy case-a Kejirwal laka thubuai a siamsak theihna tura phalna pek hi a lo rawt tawh a ni.

Delhi Assembly inthlan neih tur campaign boruak a san chhoh mek laiin BJP kaihruai sorkar laipui chuan Delhi-a rorellai, Aam Aadmi Party (AAP) hruaitu, chief minister hlui leh a deputy hlui te laka thubuai siamsak phalna a ti chhuak a ni. ED lam hian Kejriwal leh Sisodia te thubuai siamsak theihna hi dilin ni eng emaw zat liam ta khan pawmpuina hi a rawn chhuak niin ED lam hian an tarlang.

Hetih lai hian Central Bureau of Investigation(CBI) erawh chuan Kejriwal-a lakah hian nikum August thla khan MHA pawmpuina in Prevention of Corruption Act tlawh chhanin thubuai hi a lo siamsak tawh thung.

Kejriwal leh Aam Aadmi Party(AAP) hian Delhi sorkarin kum 2021-2022-a excise policy a kalpui hmangin, 'South Group' tia sawi misual pawl, Delhi a zu leh a kaihhnawih lam zuar chhuak tute hnen aṭang in thamna sum an dawng a, a policy duan hmang hian hlawkna an lo tel ve nia puh an ni. Kejriwal hi nikum March 21, 2024 khan man niin, Sisodia hi February 26, 2023 khan man niin August 9, 2024 khan Supreme Court in bail-a chhuah a phalsak a, September 13 khan Kejriwal bail dilna pawh phalsak a ni bawk.

ED lam hian Delhi, Hyderabad, Chennai, Mumbai leh hmun hrang hrang 245 chuang chu excise policy kaihhnawihah hian an dap tawh a ni.