Kashmir chungchang ngaihtuahin All party meeting nei dawn

Prime Minister Narendra Modi chuan Kashmir Valley tualchhung buaina thleng mek chungchang chinfel dan ngaihtuahin vawiin hian all-party meeting a ko.

Hetihlai hian Kashmir-ah hian a ni 34-na atan nimin khan curfew leh nawrh huaihawt chhunzawm zel a ni.

Eptu pawlten an phut angin Rajya Sabha-ah pawh Kashmir chungchang hi sawiho a ni a, eptu hruaitu Congress MP Ghulam Nabi Azad chuan inlakhhran duhtu pawlten nawrh an huaihawt chungchang chu sawichhuakin, sorkar laipui chu Kashmir mipuite rilru hminsak turin a ngen.

Rajya Sabha MP-te chuan sorkar laipui chu Kashmir buaina avangin all party meeting ko tura an phut bakah, Kashmir Valley-a pawl hrang hrangte inbiakna neihpui tura MP team tir turin an ngen bawk.

Rajnath Singh chuan all party meeting hi koh an remtih thu a sawi a, mahse MP team tir tur chuan boruak a pangngai deuh hun nghah a ngaih thu a sawi.

Kashmir Valley tualchhung buaina thleng chungchangah Pakistan chu a inrawlh niin Rajnath Singh chuan a sawi a, "Tumahin Kashmir hi kan lak aṭangin min laksak dawn lo. Pakistan nen inbiakna kan nei a nih pawhin, Kashmir chungchang hi engmah sawi a ni lo ang" a ti.

July 8-a Hizbul Mujahideen commander Burhan Wani kahhlum a nih avanga mipui leh security force-te inkara buaina chhuak vang hian mi 55 an thi tawh a, mi sang telin hliam an tuar bawk. Valley chhunga district zawng zawnga curfew puan zui nghal a ni a, mahse hmun tam zawkah chuan curfew hi thlahdul a ni tawh.

Boruak awmdanin ziaawm lam pan mah se, Valley huam chhunga zirna in leh sumdawnna hmunte chu July 9 aṭang khan khar chhunzawm an la ni a, inlakhran duhtu pawl hruaitu eng emaw zat pawh buaina a chhuah thar leh venthawn thilah hren an ni bawk.