Mahad lei chima tla bus pahnih hmu

Maharashtra-a Mahad lei chimin a chim hnan, bus pahnih chu ni riat chhung zawn a nih hnuah nimin khan hmuh an nih thu Defence PRO chuan a sawi.

Defence PRO thuchhuah chuan lei chimna
aṭanga meter 170 leh 200-a hlaa motor them nia hriatte hi hmuh an nih thu a sawi. Bus-a chuangte ruang hi zawn chhunzawm reng a ni bawk a, ruang 26 hmuh ni tawhin chin hriat lohin mi 14 an la awm bawk.

Agust 2-a Mumbai-Goa Highway-a Mahad lei a chim khan State Transport bus pahnih bakah private motor dangte a chim hnan a, lui tui lian chuan motor-te hi Konkan biala Savitir luiah a len lut a ni. He lui hi Awle tamna hmun a nih bakah tuifawn a nasat avangin chhanchhuah hna hi thawh chak theih a ni lo a, mahse thuneitute chuan ruangte leh motor tla te chu an hmuh kim hma chuan zawn chhunzawm zel an tum thu an sawi.

Mahad bridge hi British hunlaia mi a ni a, a rei tawh avangin a him tawk tawh lo nia UK sorkarin a hriattirna chu Maharashtra sorkar hian a ngaihthah nia sawi a ni. Mahse state sorkar chuan Mahad lei hi kumin December thlaah ṭhiah tura tih a ni, a ti. State minister Chandrakant Patil chuan an state chhungah lei 2,300 vel a awm a, heng zinga 100 vel chu British hun lai leh hemi hma, kum zabi 17-na lai vela dawhte an ni tawh niin a sawi.