Dalit kawngzawh huaihawtin thlawptu ngah

Dalit activist leh civil society hruaituten Dalit hnamte enhran leh kutthlak an nih fo avanga lungawi lohna lantira Gujarat-a kawngzawh runpui, Dalit Asmita Yatra, Dalit Pride March an tih bawk an huaihawt chuan, an kawngzawhna kaltlang khaw hrang hrangah thlawptu an nei ṭha hle.

August 4 khan Ahmedabad-ah km 400-a thui kawngzawhna tur bul ṭan a ni a, August 14 hian Una khuaah tawpin, Independence Day-ah chi inthliarna leh inbeihna awm ṭhin duh lohna lantirin inkhawm an buatsaih zui ang. Una khua hi tun hnaia Dalit mi, bawng thi vun lipa puh an nih avanga mualpho taka sawisak an nihna hmun kha a ni.

Kawngzawhten an kaltlangna thingtlang khuate hian an lo thlawp ṭha hle a, Dalit leh hnam hnuaihnungte chu pungkhawmin an lo hmuak ṭhin a, an zinga eng emaw zatin kawng zawh hi an zawm ve nghal zel bawk. An kaltlanga khaw hrang hrangah hian vantlang inkhawm buatsaihin, an hnam enhran an nih chungchanga an thil tawnte tualchhung mite hian an lo sawichhuak ṭhin. Kawngzawh huaihawttute hian mipui pungkhawmte chu ransa thi vun lip lo tur leh, an khuaa ran thi awmte chu paihbo turin an ngen a, an dikna chanvo nei tura theihtawp chhuah turin an fuih bawk.

Yatra member, Pratik Sinha chuan, "Khaw tinte hian tawnhriat hrang hrang an lo nei vek a, mi 200-500 vel pungkhawmin min lo hmuak ziah a ni. Khaw mipuite hian ran thi vun lip tawh lo tura an intiam bakah, enhran an nihna chu theihtawpa dodal zel turin an intiam a ni" a ti. Pratk hi kum 2002-a Gujarat intualvuakna rapthlak thlenga kut tuarten an dikna chanvo an hmuh theihna tura beitu, human rights lawyer Mukul Sinha fapa a ni. Pratik-a nu, Nirjari pawhin yatra hi a zawm ve a ni.

Kawngzawh huaihawttu zinga mi, Jignesh Mewani chuan Dalit mite zalenna tura an beihna a nih thu sawiin, ram pumah an hmalakna chu thehdarh zel an tum thu a sawi. Yatra-ah hian IPS officer hlui, Rahul Sharma pawh a tel. Sharma hi Gujarat-a Narendra Modi a chief minister laia police hotu lo ni tawh a ni.