India in Israel-Hamas inkahhai puan thlawp; Gaza-ah chhawmdawlna pek thuai beisei

Israel leh Hamas-in Gaza Strip-a inkahhai puan a, an mi hrente in thleng an remti thei ta tih Nilainia US leh Qatar in an puan Ministry of External Affairs(MEA) chuan a lawmpui thu sawiin, Gaza Strip-a chengte tan chhawmdawlna pek thuai theih a beisei thu nimin khan a sawi.

MEA chuan a thuchhuah siamin," Gaza-a inkahhai puan leh mi hren te in thleng remtih a ni chu kan lawmpui hle a, hei hian Gaza-a mihring cheng te himna tur leh an mamawh ang chhawmdawlna thawn luh a tih awlsam ngei kan beisei bakah remna leh muanna a awm zel theih nana inbiakna pawh a awm ngei ka duh sak a ni" a ti.

Qatar prime minister Sheikh Mohammed bin Abdulrahman bin Jassim al-Thani chuan Nilaini khan thuthar thehdarhtu te kawmin, Israel-Hamas indona thlen mekna Gaza Strip-ah inremna siam a nih thu leh, inkahhai puan chu Pathianni aṭanga hman ṭan a nih tur thu a sawi a ni.