PM hoin International Yoga Day hmasa ber hmang

International Yoga Day hmasa ber chu nimin khan ramchhung hmun hrang hrangah hman a ni. Prime Minister Narendra Modi chuan New Delhi-a Rajpath-ah Yoga Day lawmna hi hmanpuiin, pungkhawmte rualin yoga a practise ve nghal.

Yoga Day hmanna pui ber, New Delhi-a Rajpath-ah chuan venhimna khauh taka kalpui niin, mi 35,000 chuang an kalkhawm a, an zingah hian cabinet minister, diplomat, ramdang palai, sokar official, NCC cadets leh zirlate an tel. Ramchhung hmun hrang hrangah he hun hi mi tluklehdingawn 2 velin an hmang a ni.

President Pranab Mukherjee pawhin Rashtrapati Bhawan-ah a hmanpui. Union minister, MP leh MLA-te chuan an awmna state hrang hrangah Yoga Day hi an hmanpui bawk.

Ramchhung bakah rampawn lamah pawh Yoga Day hi hman a ni a, UN headquarters-ah pawh hman niin External Affairs Minsiter Sushma Swaraj-in a hmanpui a ni.

Rajpath-a hun a hman zawh hnuah, PM Modi chuan Vugyan Bhawan-ah ni hnih awh tur, International Yoga Conference a hawng nghal a ni. PM chuan hlawhtling taka Yoga Day hman a nih avangin ramchhung mipuite leh khawvel ram hrang hrang amite chungah lawmthu a sawi. International Yoga Day hmasa ber hriatrengna atan Modi hian coin leh stamp a tlangzarh nghal a ni.

PM chuan Yoga hian khawvel chu a suihkhawm dawn a ni tih sawiin, "Yoga hi exercise ringawt a ni lo, thurin a ni zawk," a ti. Yoga ṭangkaina hrechiang lote chuan an ringhlel tih a sawi. Yoga chu zawrhsum a ni lo a, sum lama hlawkna hmuh tuma tih tur a ni lo, tiin Modi chuan a sawi.

PM Modi-a'n nikum UN General Assemby-a thu a sawi ṭuma rawtna a siam angin, UN chuan nikum December thla khan June 21 chu International Yoga Day-ah a puang a ni.