Mumbai-a zu chhe in vanga thi 90 tling tawh

Mumbai-a zu chhe in vanga thi chu mi 90 an tling tawh a, mi 30-te chu damdawi-in hrang hrangah enkawl mek an ni bawk.

Damdawi-in enkawl mi ṭhenkhat chu an dinhmun a ṭhat loh avangin thi zat pawh an la punchhoh rin a ni. Zu chhe in vanga thi zinga a tam zawk hi mirethei veng, Laxmi Nagar-a cheng an ni.

Zu chhe in vanga thi leh damlote hi Nilaini zan leh Ningani zinga Rathodi khuaa zu inte an ni. He thil thleng avang hian Malwani police station a Inspector, Prakash S. Patil bakah police hotu 3 leh Constable 4 chu hna thawk ṭha loa puh an nih avangin chawlh tir an ni tawh tih Police Deputy Commissioner Kulkarni chuan a sawi.

Police-te chuan zu ṭha lo nia sawi hi a sample lain, enfiah turin an thawn tawh a ni.

Chief Minister Devendra Fadnavis chuan he chhiatna thleng hi chhui chiang tur leh ni hnih chhunga report thehlut turin Ningani zan khan a lo hriattir tawh bawk.

Kum 2004 khan Mumbai-ah hian zu chhe in vangin mi 87 an lo thi tawh bawk a, he thil thleng kaihhnawihah hian mi 19 chu thiam loh chantir an ni.