Lalit Modi-a'n British lal chhungkaw puihna a dil

Sum tichingpen leh dan bawhchhiaa puh, Indian Premier League (IPL) Commissoiner hlui Lalit Modi chuan UK Home Office-a travel document a dilnaah, British lal chhungkuaa Prince Charles leh Prince Andrew-te puihna a dil nia sawi a ni.

The Sunday Times-in a tarlan danin, Kumpinu Queen Elizabeth II-i fapa upa ber dawttu, Prince Andrew leh Lalit Modi hi hun rei tak aṭanga inhre tawh an ni a, nikum July thlaa Modi-a travel paper a dilna pawmsak a nih hma lawk khan London-a Modi chenna inah an inhmu tiin a tarlang.

British lal chhungkua, Buckingham Palace chuan Modi leh Prince Andrew-te inhmuh chhan hi a sawilang lo a, mahse UK sorkarah Modi-a tan a dilsak lo tih erawh a sawi thung.

Modi-a'n travel paper a neih theihna atan External Affairs Minister Sushma Swaraj-i biaa ṭanpui a dil hnuah, Swaraj-i hian a pui ta, tiin UK chanchinbu chuan a tarlang. He thu puanzar a nih hnu hian ramchhungah Modi hian buaipui a hlawh zui hle a, eptute chuan dan bawhchhetute a ṭanpui avang hian minister hi bang turin an phut a ni. Mahse hemi chungchangah hian Prime Minister Narendra Modi chu tun thlengin a la ṭawngchhuak lo.

Congress party chuan BJP kaihhruai NDA sorkar chu Lalit Modi hum tumah a puh a, hei vang hian a chungchang chhui turin Supreme Court ruat, Special Investigation Team din a phut. Congress hruaitu Anand Sharma chuan, "PM hian a ngawih reng avangin he boruak hi a tawp mai beisei suh se. He thil hi External Affairs Minister leh Rajasthan Chief Minister-te inhnamhnawihna thil a ni," tiin, ngawihsan mai an tum loh thu a sawi.