Yeddyurappa lakah eiruk thubuai pathum thehluh

Karnataka Lokayukta police-te chuan Karnataka Chief Minister hlui, BS Yeddyurappa lakah nimin eiruk thubuai pathum an ziaklut a, kar kalta Inrinni khan thubuai pahnih an lo siamsak tawh bawk.

Lokyukta official chuan civic activist pakhat, Jayakumar Hiremath-a complain thehluh behchhanin, CM hi Prevention of Corruption Act hnuaiah thubuai siamsak a ni, a ti.

Yeddyurappa hi BJP national vice president a ni a, kum 2011 July 31 khan Ombudsman Justice N Santosh Hegde-a'n sum tam tak tihchingpena a puh avangin CM a nihna aṭangin a bang a ni.

Yeddyurappa laka thubuai ziahluh zingah hian South West Mining company hnenah dan kalha phalna a pek chungchang te, hemi avanga a chhungte'n company aṭanga cheng vaibelchhe 20 dawnga puhna te, kum 2007-2012 inkara a kaihhruai sorkar hnuaia dan loa ram acre 212.39 laksaka puhnate a tel.

Police-te chuan CM hlui lakah hian tunkar chhungin thubuai ziahluh belh a la ni dawn tiin an sawi a, thubuai pasarih thleng siamsak pawh a ni thei, tiin an sawi.