Rahul Gandhi-a'n AIIMS kawta damlo chhungte tlawh

Congress party hruaitu Rahul Gandhi chuan Ningani khan All India Institute of Medical Sciences(AIIMS), New Delhi-a awm damlo leh chhungte, damdawi-in pawn lam khawlaia riakte chu tlawhin, damlo leh an chhungten Delhi sorkar leh sorkar laipui aṭanga ngaihsakna mumal an dawng lo chu na taka sawiselin hma la thuai turin a phut.

Damlo leh an chhungte hi AIIMS-a in enkawlna ṭha hmuh beisei ni mah se khawlai boruak vawt leh awmna mumal pawh awm loah an riak mai mai nia tarlan a ni. Lok Sabha Leader of Opposition hian damlo leh an chhungte, khawlai leh damdawiin chheh vela awmhmun khuarte hi kawmin a tlawh kual a ni.

Rahul Gandhi chuan social media-ah tarlangin," Boruak vawt tak hnuaiah natna khirhkhan tak nei chungin hmun hla leh kilkhawr tak tak aṭangin AIIMS hi an rawn pan a, mahse enkawlna an beisei ang leh ngaihsakna an mamawh ang hi an dawng lo a, hei hi Delhi sorkar leh sorkar laipui in a ngaihsak tawk loh vang a ni" tiin a sawi. Sorkar laipui leh Delhi sorkar chu vantlang mipui mamawh ngaihtuah kawngah hian an hlawhchham der a ni, a ti bawk.

Congress pawhin X ah post siamin,"Mipui eng emaw zat, hmun hla tak aṭanga in enkawl tura lo kalte chu sorkarin a tih tur leh ngaihtuah tur a tih loh vangin dinhmun hrehawm tak leh hmun hrehawm takah an awm phah a ni" a ti. Gandhi-a'n damlo leh an chhungte a kawm laite video pawh an dah lang bawk a ni.

AIIMS pawn lam khawlaia riak zingah hian hmeichhe naupang kum 13 mi, thisen cancer pawh a tel. Nikum December 3 khan helai hmun hi an thleng tawh a, mahse tun thlengin damdawi-inah enkawlna mumal an la dawng lo a ni.