Hri kai hmuh chhuah thar aiin dama puan A zawnin ni nga chhung an tam tawh zawk

India rama hripui kai pung zel karah enkawl dam pawh an tam tawh a, enkawl dam rate pawh a sang tawh hle. Nimina sorkar report tihchhuahah pawh hri kai hmuh chhuah thar aiin enkawl dam an tam leh zawk a, a zawnin ni nga chhung chu hri kai hmuh chhuah thar aiin enkawl dam an tam tawh zawk.

Ramchhung hmun hrang hrangah hri kai mi nuai 56 chuang an awm tawh a, heng zingah nuai 9.6 chuangin hri an la kai mek a, nuai 45 chuang chu enkawl dam tawh niin mi sing kua leh tlemin an thihpui tawh a ni.

Maharashtra chu India ram state zinga hri kai tamna ber ni zelin mi 12,42,770-in hri an kai tawh a, enkawl dam 9,36,554 lai an awm tawh thung. Hri kai tam ber dawttu Andhra Pradesh-ah chuan mi 6,39,302-in hri an kai tawh a, Maha nen hi chuan an dinhmun a inthlau hle.

Ministry of Health and Family Welfare-in nimina report a tihchhuahah chuan Thawhlehni khan hri kai hmuh chhuah thar mi 83,347 an awm leh a, dama puan 89,746 awm thungin mi 

1,085-in an thihpui leh a ni.

India ramah hian nimina sorkar report tihchhuah thleng khan Covid-19 kai 56,46,010 an awm tawh a, enkawl dam 45,87,613 awm tawhin 90,020-in an thihpui tawh a, 9,68,377-in hri an la kai mek a ni.

Enkawl dam tawh rate hi 81.25% a ni tawh a, hri kai mek rate chu 19.5% a ni bawk. Thihpui rate chu 1.59% a ni tawh thung.

Indian Counil of Medical research (ICMR) chuan nimina report an tihchhuahah sample 9,53,683 an endik leh tih an tarlang a, hri len ṭantirh aṭanga nimina report an tihchhuah thleng hian mi 6,62,79,462-in hri an kai tawh.

ICMR hian sample endikna tur laboratory pawmpui 1,786 an nei tawh a, 1,063 chu sorkar laboratory niin 723 chu private laboratory a ni thung.