Eptute boycott chungin RS-ah bill pathum pass

Eptu party-ten Rajya Sabha rorel inkhawm an boycott chungin nimin khan House-ah labour code bill pali zinga pathum pass a ni. Pathiannia Rajya Sabha-a sawisel hlawh tak farm bill ngaihtuah a nih ṭuma deputy chairman-in physical voting neih a remtih loh avangin eptute hi an lungawi lo a, Thawhlehni aṭang khan Parliament in hniha rorel inkhawm an boycott a ni. Eptute tel loin nimin khan Rajya Sabha chuan bill pathum hi a pass a, inkhawm pawh tiam chin awm loin tihtawp zui a ni bawk. 

Rajya Sabha-a bill pathum pass te hi - Occupational Safety, Health and Working Conditions Code, 2020;  Industrial Relations Code 2020 leh Code on Social Security, 2020 te an ni a, Thawhlehni khan Lok Sabha chuan a lo pass tawh bawk a ni. Congress leh eptu party dang MP-te chuan farmer bill leh labour bill pass takte hi duh lohna lantirin nimin khan Parliament compound chhungah kawng an zawh a, prime minister Narendra Modi kaihhruai sorkar chetdan chu democracy kalphung kalh a ni, an ti.