India leh China-in sipai dah belh loh an rem ti

India leh China chuan ramria sipaite intihbuaina hmunah sipai dah belh loh an rem ti a, hei hi ram pahnihte inkara buaina a punlun chhoh zel lohna atana ti an ni. 

Ladakh-a ram pahnihte intihbuaina a thlen chhunzawm loh nan Thawhṭanni khan ram pahnih sipai official-te chuan inbiakna an nei tih Chinese defence ministry thupuangtu Wu Qian chuan a sawi.

Inbiakna neih zawh hnuah India leh China sipaite hian thuchhuah inṭawm siamin, intihbuaina leh intihthiam lohnate a awm loh nan ramria intihbuaina thlen fona hmunah sipai dah belh loh an rem ti ta a ni. Thawhṭannia ram pahnih sipai official-te inhmuhnaah hian Ladakh leh a chhehvela hmalak dan tur ang khata an neih theihna turte pawh sawiho a ni bawk. 

Kar liam ta khan defence minister Rajnath Singh chuan China lam hian inremna an ziah chu vawi tam an bawhchhiat tawh thu sawiin, an sipaite chu ramria intihbuaina thlenna hmunah an dah belh zel thu a lo sawi tawh a ni.