Narendra Modi zinna sensoah Rs vbc 517.82 seng tawh
Ministry of External Affairs (MEA) tarlan danin kum 2015 aṭang khan prime minister Narendra Modi chuan ram hrang hrang 58 a tlawh tawh a, a zinna senso hi cheng vaibelchhe 517.82 a ni.
Prime Minister-in ram hrang hrangte a tlawhnaah hian trade, investment, technology leh defence lamah thawhdunna tur, Memorandum of Understanding (MoUs) tam tak chu a ziahpui niin MEA chuan a tarlang.
Minister of State (MoS) V Muraleedharan chuan Thawhlehnia MP Fauzia Khan zawhna ziaka a chhannaah hei hi tarlangin, PM zinna te hi India ram hmasawnna tur atan a nih thu a sawi a, ram dangte nena inlaichina ṭha neih theihna tur leh, India ram ṭhan chho zelna tur atana pawimawh a nih thu a sawi.
Muraleedharan hian March thlaa budget session neih ṭum khan kum nga chhunga PM-in ram dang a tlawhnaa sorkarin sum a sen zat hi a lo tarlang tawh a, mahse sum sen zat hi tun ṭuma a tarlan nen a inang lo thung. Hemi ṭum hian MEA chuan PM zinna atana sum sen zat hi Rs vbc 446.52 niin a tarlang.
PM India website chuan Modi hi kumin chhungin ram dangah a zin chhuak lo niin a tarlang a, mahse MEA-in PM-in ram dang a tlawhnaa sum senso hi March thlaa a tarlan aiin tun ṭum a tarlanah hian cheng vaibelchhe 125.30 in a pung thung a ni.