Damlo enkawl ṭhat loh vangin doctor ban

Uttar Pradesh Chief Minister Akhilesh Yadav chuan Bahraich district-a sorkar hospital-a chief medical officer chu August 9-a damdawi-ina nausen thla 10 mi thih chungchangah a hnatlin lohah ngaiin, a hna
aṭangin a ban.

CM chuan thuchhuah siamin, CMO chu a hnaa a inthlahdah avangin hrem a nih thu a sawi a, "Damlo ngaihsak lo official-te chungah hremna lekkawh zel a ni ang" a ti. Nausen thih dan chungchang hi chhui chian a nih tur thu a sawi bawk.

National Human Rights Commission chuan nausen thih dan chungchang media report chu state sorkar hnenah hian hriattirin, kar li chhunga a chhanna pe turin a lo hriattir tawh a ni. NHRC chuan nausen thihna thlen dan chu damlo rethei zawkte dikna chanvo palzutna lian tak a ni tiin, sorkar hospital-te chu mipui nawlpui, a bikin mi rethei zawkten an pan ber a ni a, heng damlote hi a hun taka enkawlna pek an ni tur a ni, a ti.

Media report-in a tarlan danin, nurse chuan nausen damlo nu leh pate hnenah an document tihfel sak turin pawisa pek a phut a, a ni bakah hian ward-a hmunphiattu chuan khum an chan theih nan thamna pe turin a lo phut a, damdawi-in an luh tukah nausen khawsik jection-tu tur, medical assistant chuan sum pe turin a phut bawk a ni. Sorkar damdawi-inah chuan heng hi a thlawna pek vek an ni. Nausen nu leh pa leh medical assistant-te hi an inhnial zui a, nausen hi jection a nih hmain a thi ta nia sawi a ni.

Report chuan nausen pa hi nitina inhlawhfa a ni a, damdawi-ina thawk doctor, private clinic neite tih loh staff dang zawng chuan thamna sum pe turin an phut vek tih a sawi.

Nausen thihna thlen dan chungchangah damdawi-in hotu ber chu a hnathawktute ngaihven tawk lo leh inthlahdahah puhin ban a ni a, hmunphiattu hi ban a ni bawk a, nurse hi hmun dangah sawn a ni tawh bawk.