ISRO hotu hlui thubuai siamsak

Central Bureau of Investigation (CBI) chuan Antrix-Devas deal thubuai kaihhnawihah Ningani khan Indian Space Research Organisation (ISRO) chairman hlui G. Madhavan Nair leh official dangte lakah charge sheet a theh≠lut. Inremna an siamna aṭang hian Devas Multimedia Private Limited chuan dik lo taka chein cheng vaibelchhe 578 in a hlawk phah nia sawi a ni.

Charges sheet hi Delhi court-ah theh≠luh a ni a, Nair baka thubuai siamsakte chu Department of Space-a additional secretary hlui Veen S Rao, ISRO director hlui A. Bhaskar Narayana Rao, Antrix Executive Director KR Sridhara Murthi te an ni. He inremna siam lai hian Nair hi Department of Space-ah secretary a ni. Kumin May thla khan CBI hian thubuai kaihhnawihah hian thu an lo zawtfiah tawh bawk.

Agency chuan Managing Director of Forge Advisors (U.S.A.) leh Devas CEO Ramachandra Vishwanathan, ISRO scientist MG Chandrasekhar leh Devas Multimedia director pahnih M.Umesh leh D.Venugopal-te hming pawh tarlan a ni thu a sawi. Heng mite hi inbumna, phiarrukna leh eiruknaa inhnamhnawiha puh an ni.

CBI thupuangtu RK Guar chuan, "Heng sorkar official-te hian an nihna chu dik lo taka hmangin, Devas hnenah hian S-Band in GSAT-6 leh GSAT-6A satellite leh terrestrial system kaltlangin mobile phone tana video, multimedia content leh information service pekchhuah phalna an pe a ni. Hei vang hian he private firm leh a neitute hian dik lo takin cheng vaibelchhe 578 zet an hailut a ni" a ti.