Vawiin-ah rampumah I-Day lawm dawn Delhi khawpuiah venhimna tikhauh

India Independence Day vawi 70-na chu vawiin hian ram pumah lawm a ni dawn a, venhimna lam pawh khauh taka kalpui a ni.

Independence Day lawmna pui ber neihna tur, Delhi-a Red Fort-ah chuan venhim hna thawk turin security force 6,000 vel dah a ni. Prime Minister Narendra Modi chuan he hmun aṭang hian ram mipuite hnena thuchah a sawi dawn a, senior minister, bureaucrats, ramdang palaite bakah mipui ṭhahnem tham tak an tel beisei a ni.

Red Fort-ah hian venhimna thuah eng emaw zata siam a ni a, sepcial NSG sniper leh commando team te pawh dah niin, drone leh projectile hmanga boruak aṭanga beihna thleng palh theih veng turin anti-aircraft gun-te pawh dah an ni tih police official-te chuan an sawi.

Delhi Police-te chuan Inrinni aṭang khan khaw≠pui-ah hian para-gliding, UAV leh hot air balloon thlawh tirte pawh an lo khap tawh a, October 10 thleng khap chhunzawm a ni ang.

Police-te chuan Red Fort chhehvela cheng, mi 9,000 te chanchin kimchang pawh an lakhawm vek a, Red Fort eptu building-te chu police leh paramilitary force-ten an veng vek dawn a, thingkung 3,000 chuang pawh ven an ni bawk.

PM-in a chenna, 7RCR aṭanga Red Fort a panna kawngah pawh venhimna khauh taka kalpui a ni a, CCTV ca≠mera za chuang zet dah a ni. I-Day lawmna hmunah hian CCTV 200 leh high mast pahnih, high resolution camera-te dah niin, hengte hi control room aṭangin vil reng an ni dawn a ni.

Khawpui chhung≠a parking area hrang hrangte pawh uluk taka ven an ni dawn bawk a, venhim hna thawk tur hian uisa thiam 60 chuang hman tel an ni bawk. I-Day lawma puala venhimna kalpui dan hi July thla aṭang khan ruahman a ni tawh a, senior police leh intelligence official-te chuan thil fel lo awm thei turte thlirin vawi tam tak an ennawn a ni.

Sorkar laipui chuan vawiin-a I-Day lawmnaah hian plastic aṭanga siam National Flag hmang lo turin state leh Union Territories-te a ngen. Home Ministry chuan thu≠chhuah siamin, state leh UT thuneitute chu Flag Code leh Preventions of Insults of National Honour Act ngai pawimawh turin a ngen. Hnam puanzar zah lo leh tibawrhbangtu chu hremna, kum thum thleng lungin tantir leh sum tam tham tak chawi tir theih a ni.

Sign language-a ti≠chhuak turin ngen :

Vawiin-a I-Day lawmna hi ri hriatna lama harsatna neiten an thlir ve theihna turin, sign language hmanga tichhuak tel turin sorkar chuan private TV channel-te a ngen. Information and Broadcasting ministry chuan civil society-te hnen aṭangin ngenna an dawng tih a sawi a, DD News leh DD Bharati-te chuan sign language hmang hian Delhi-a I -Day lawmna chu an tichhuak tel dawn a, hei hi private channel-ten a thlawna an lakchhawn phalsak an ni ang.