PM-in I-Day thuchah sawi

India Independence Day vawi 70-na chu nimin khan ram pumah lawm a ni a, a lawmna pui ber New Delhi-a Red Fort-ah Prime Minister Naredra Modi chuan ram mipuite hnenah thuchah a sawi.

Narendra Modi hian PM a nih anga Independence Day thuchah a sawi
ṭum thumna a ni a, minute 100-a rei a sawi a ni. Tun ṭuma a thusawiah hian PM hian kum dang angin sorkarin a tih tura a tiamte a sawilang tam lo a, sorkar hma lo lak tawhnate a sawilang tam zawk thung.

Indenpendence Day puala PM thusawi zinga ṭhenkhatte :

Mipuite dinhmun chawikang turin hmalam pan zel a ngai a, hemi atan hian ram mipui vaibelchhe 125-ten mawhphurhna an nei vek a ni.

Ramchhungah harsatna hrang hrangte awm mah se, a chingfel thei tur mi vaibelchhe 125 an awm.

Mipui, a bikin middle class chhung≠kuaten income tax thuneitute an hlauhna hi thlak danglam kan tum.

Mipui nawlpuite nunphung chawikan ka duh a, hemi atan hian ka bei dawn a ni.

Sorkar hospital lian zawng zawng≠ah online registration a tih theih tawh a, medical record-te pawh online-in a hmuh theih vek tawh a ni.

Awlsam zawkin passport a dil theih tawh a, a thla tel hun hman ngai ṭhin khan kar 1-2 chhung leka tihfel theih a ni.

Kum hnih kalta chhung khan khawkheng avangin sorkarin thil man sang chungchangah harsatna a tawk nasa hle. Sorkar hmasa hnuaiah khan thil man sanna hi 10% zet te a tling pha a, mahse kan sorkar hnuaiah chuan 6% a pel lo.

Eirukna tihbona turin sorkar scheme hrang hrangah Aadhar card kan thlunzawm a ni.

Retheihna lak aṭanga zalen hi indepenence lian ber a ni.

Prime Minister chuan firfiaka chetna leh thawhrum thawhna thlengte chu a dem thu a sawi a, India chu firfiaka chetna lakah a tlawm ngai dawn lo tih a sawi. Ṭhalaite chu tharum thawhna bansan a, nunphung pangngai zawh turin a chah bawk.

Modi chuan Pakistan chungchang pawh sawilangin, India ram beitu firfiakte chawimawiah a puh a, hetih≠lai hian firfiakten Peshawar-a school naupangte an beih ṭumin India chuan a lo tuarpuiin a lo ṭahpui a ni, a ti. Pakistan-a Balochinstan bial mipuite, Gilgit leh Pakistan-occupied Kashmir mipuite pwhin firfiakte a dodalna avangin lawmthu an hrilh niin a a sawi a, hei hi lawmawm a tih thu a sawi lang.

PM chuan ram tana zalenna sualtu, freedom fighter-te pension chu 20% a tihsan a nih thu a sawi a, thla khata Rs 25,000 la ṭhinte chuan Rs 30,000 an la thei dawn a ni, a ti. Sorkar laipui hian nikum August thla khan freedom fighter-te dearness relief chu 218% in a lo tihsan sak tawh bawk a ni.

Tuna freedom fighter-ten pension an lak dan chu, Andamans jail-a tang tawhten thla khat Rs 23,309 an la a, an nupui/pasal ten Rs 20,129, a fanu pasal nei loin Rs 4,770 an la a ni. Kum 2015, January 1-a central freedom fighter pensioner awm zat chhinchhiah chu mi 35,900 an ni.

Modi chuan state hrang hrangah tribal freedom fighter-te chawimawina lantirna tur museum te siam a ni dawn tih a sawi bawk. Modi chuan, "Ram zalenna kan sualna kawngah tribal-te an pawimawh hle. Ram tana an inpekna ropui ziate ṭhangtharte an hriat theihna turin museum hawn hi kan tum a ni" a ti.