J&K CM in an state buai chhanah sorkar laipui puh

Jammu and Kashmir Chief Minister Mehbooba Mufti-i chuan nimin an state-in India Independence Day a lawmnaa thu a sawiah, an state buaina chu silai hmanga chinfel theih a nih loh thu leh, an buaina tawh mekah sorkar laipui chu mawhphurtu a nih thu a sawi.

CM Mehbooba Mufti-i chuan, "Kashmir mipuite hian silai hman kan duh lo a, tharum thawhna pawh kan duh lo. Tuna Jammu and Kashmir dinhmun tawh mek chu ram hruaitute vang a ni. Jawaharlal Nehru aṭang khan political party hrang hrang leh ram hruaitute chuan J&K chungchangah hian thil an tisual vek a ni" a ti.

Kashmir Valley-a Hizbul Mujahideen commander pakhat thah a nih hnu khan tualchhung mi leh security force-te inkarah buaina a chhuak a, tharum thawhna nasa tak a thleng zui a ni. Security force-ten silai mu lem an kahchhuah chuan mi tam tak mitah fuhin, mit del phah turte pawh an awm a ni. Tualchhung buaina chhuak vang hian mi 50 chuang an thi tawh.

Nimin khan Srinagar-a Nowhatta bialah firfiakten CRPF camp an bei a, sipai pakhat an kaphlum a, mi dang pakua an kap hliam. Camp beitu firfiak hian eng zat chiah nge an ni tih hriat a ni lo a, security force-te chuan firfiak zinga pahnih an kaphlum.