Una khuaah Dalit-ten I-Day lawm

Dalit hnamte chuan a huhoin Gujarat-a Una khuaah Independence Day an lawm a, he hunah hian kumin January thlaa Hyderabad university hostel-a Dalit zirlai intihlum, Rohith Vemula-a nu, Radhikha Vemula-i chuan hnam puanzar a pawtpharh.

Dalit hnamte hian enhran leh tihduhdah an tawh fo duh lohna lantirin ni 10 awh tur kawngzawh, Dalit Pride Yatra an huaihawt a, August 4 khan Ahmedabad aṭanga zawh ṭanin, km 400 zeta thui an zawh hnuah Pathianni khan Una khuaah hian an tawp a ni. Una khua hi July 21-a bawng thi vun lipa puh an nih vanga Dalit mi pasarihte sawisak an nihna hmun a ni a, he khuaah hian I-Day lawmna hi an buatsaih zui a ni.

Una khuaa I-Day lawmnaah hian Jawaharlal Nehru University (JNU) zirlai hruaitu Kanhaiya Kumar pawh a tel.

Dalit-ten I-Day lawmna an buatsaihah hian Una leh state chhung hmun dang aṭangin Muslim tam takin an telpui a, pungkhawmte hian Dalit hruaitu Baba Saheb Ambedkar poster leh thlalak te an keng a ni.