Amnesty India lakah thubuai ziak lut

Karnataka Police-te chuan human rights group, Amnesty International India chapter lakah sorkar laka hel tura mipuite fuihpawrha puhna thubuai an ziak lut.

Amnesty India hian kar kalta Inrinni kha Bengaluru-a United Theological College-ah Kashmir buaina tawh mek chungchangah debate a huaihawt a ni. Debate neihnaah hian zirlai ṭhenkhat, Kashmir state aṭanga kalte chuan India sorkar leh sipaite chetdan an duh loh thu leh Kashmir zalenna an duh thute an aupui a ni. He thil thleng vang hian BJP student wing, Akhil Bharatiya Vidyarthi Parishad (ABVP) chuan Thawhṭanni khan police-ah complain an thehlut a, thubuai ziahluh a ni. ABVP hian nimin khan lungawi lohna an lantir chhunzawm bawk.

Karnataka Home Minister G Parameshwara chuan he thil thleng hi an chhuichiang dawn tih a sawi a, India dodalna thu aupui zinga inhnamhnawihte chu chhui≠chhuah an nih tur thu a sawi.

Amnesty India chuan an pawl laka FIR thehluhna copy hi an la dawng lo tih a sawi a, an debate buatsaih chu Jammu and Kashmir-a an dikna chanvo palzut sakte tana rorelna dik an hmuh theih nana an hmalakna kawng khat a ni tih an tarlang.

Thuchhuah siamin Amnesty India chuan, "Debate neihna hmunah hian police-te pawh sawm niin an tel ve a ni. Kan laka complain thehluh leh, sorkar laka hel tura fuihpawrh anga thubuai min siamsak hian, India mipuiten dikna chanvo leh zalenna an neihte an rin ngam tawk loh zia a tilang a ni" a ti.

Amnesty thuchhuah chuan an inkhawm buatsaih hi ṭha taka neih a ni a, an thu sawihoah pawh Kashmir-a mi ṭhenkhat an dikna chanvo palzut sak an nih leh, rorelna dik an hmuh loh chungchang chauh sawiho a ni, a ti. Inkhawm tawp dawn lamah mi ṭhenkhatin zalenna an duh thute an au chhuahpui a, hei hi anni chuan an dodal emaw, an lo phurpui emaw hran lo tih a tarlang bawk.