J&K-ah sipaite hmanraw hman tur rawtna thehlut

Jammu and Kashmir tualchhung buaina thleng mekah sipaite silai mu lem kahchhuahin mi tam tak a hliam bakah, mitdel phah hial tur eng emaw zat an awm avangin sawisel an tawk a, hei vang hian hmanrua thlak dan tur an ngaihtuah.

Sorkar laipui chuan Kashmir Valley-a sipaite silai mu lem hman chungchang ngaihtuah tur hian committee pawh a din tawh a, Army chuan silai mu lem thlakna atan hian mipui hnawhdarhna atan pepper shot leh chili grenade te hman a rawt a, a rawtna hi committee-ah pawh thlen a ni tawh. Party hrang hrang MP-te pawhin silai mu lem hman tihtawp hi an duh thu an lo sawi tawh a ni.

Jammu and Kashmir High Court chuan paramilitary force-ten silai mu lem an kahchhuahah, mipui pungkhawm zinga tam takin an khup chunglam, tam takin an mitah te hliam an tawrhna chhan chu sawifiah turin sorkar laipui a lo phut tawh bawk.

July thla tir lam aṭanga Kashmir Valley-a buaina chhuak vanga thi hi mi 64 an tling tawh. Hmun tam takah curfew leh punkhawm khapna dan hman chhunzawm a la ni bawk. Boruak hian ziaawm lam a pan hnuin, Thawhlehni khan Budgam district-a Magam khuaah mipui leh security force-te inkarah buaina a chhuak thar leh a, mipui pungkhawmte hian police-te chu lung in an tawng a, pungkhawmte hnawhdarh nan hian security force-te hian silai an hmetpuak a ni. Magam khuaa buaina chhuakah hian mi pali an thi a, mi dang 15 in hliam an tuar.