Gujarat-ah Dalit mite sawisak rawn

Gujarat-a Una khuaa Dalit hnamin lungawi lohna lantira rally an huaihawta tel ṭhenkhat chu an haw lam, Samter khuaah mipui pungkhawmten an sawisak rawn a, mi pariattin hliam na tak an tuar.

He thil thlen hun hi Thawhlehni tlai dar nga vel a ni a, police-te chuan mipui pungkhawmte hnawhdarh nan hian tear-gas an hmang niin an sawi. Hetihlai hian kut tuartute chuan police-te hian an mahni
ṭanpui turin eng thil mah an ti lo tih an sawi thung.

Dalit mi kut tuarte hian an mahni khawihtute chu Samter khaw mite an nih thu an sawi a, July thlaa Una khuaa Dalit mi pasarih sawisaknaa inhnamhnawihah puha, Samter khaw mi 12 man an nih vanga phuba an lakna niin an sawi.

Samter khaw miten an sawisak, Dalit mite hi mi 20 an ni a, Bhavnagar district a mite an ni. Una khuaah hian Dalit hnamte enhran leh kutthlak an nih fo duh lohna lantira rally an huaihawt tihtawp a nih hnuah Indepen≠dence Day lawmna an buatsaih a ni. I-Day lawmnaah hian kumin January thlaa university-in a hrem avanga Hyderabad University hostel-a inawkhlum, Rohith Vemula-a nu, Radhika Vemula-i chuan hnam puanzar a pawt parh a ni. He inkhawmah hian sorkar laka hel tura midangte fuihpawrha puha thubuai siamsak, JNU zirlai pawl hruaitu Kanhaiya Kumar pawh a tel a ni.

Una khua aṭanga an haw lam chu Samter-ah mipui pungkhawmte hian lo tidingin kut an thlak zui a ni. Gir-Somnath police control room chuan mipui pungkhawmte hnawhdarh nan hian tear gas hman a ni a, an kaldarh duh loh vangin tiang nen an um darh niin a sawi. Mahse kut tuartute chuan police-te awm laiin kut thlak an nih thu an sawi a, a hnuah tear gas hi an hmang chauh a ni, an ti.