Pakistan-in inbiakna nei turin India sawm

Pakistan chuan Kashmir chungchangah inbiakna nei turin India a sawm a, Kashmir buaina chinfel chu ram pahnihte mawhphurhna a ni, a ti.

Thawhṭanni khan Pakistan-a Indian High Commissioner Gautam Bambawale chu Pakistan Foreign office chuan koin, inbe tura sawmna lehkha hi an hlan a ni. Pakistan adviser on foreign affairs chuan kar kalta khan Pakistan palaiten conference an neihah, India nena inbiakna neih rawt hi an lo remti tawh niin a sawi.

Hemi hma hian Union Home Minister Rajnath Singh chuan Parliament-a Kashmir buaina an sawihonaah, India chuan Pakistan-occupied Kashmir (PoK) chungchang chu Pakistan nena sawidun an duh thu a lo sawichhuak tawh a ni.

Kashmir chungchangah Pakistan leh India inkar boruak hi a ṭha lo hle a, Prime Minister Narendra Modi pawhin Independence Day thuchah a sawiah Pakistan ram chhunga PoK leh Balochistan bialte ten zalenna an duh chu a thlawp thu a lo sawichhuak tawh a ni.

Finance Minister Arun Jaitley pawhin Pakistan-a SAARC conference hmang tura kal a tum chu a ṭhulh a, a aiah Economic Affairs Secretary Shaktikanta Das a kal dawn nia sawi a ni a, mahse tihfel a la ni lo. August 25-26 hian Islamabad-ah SAARC finance minister meeting hi neih a ni ang.

Defence Minister Manohar Parrikar pawhin Pakistan-a kal chu hremhmuna kal ang a ni tiin a sawi bawk. Jaitley-an conference kal tur a ṭhulh thu tarlan a nih hnuah Parrikar hian he thu hi a sawi a ni.

Parrikar chuan Rewari-a party meetah Thawhṭanni khan firfiak panga chu Pakistan lamah sipaiten an um let tih a sawi. Pakistan sorkar chuan firfiakte a lo thlawp ṭhin avangin a nghawng a tuar let mek a ni, a ti.