Saeed-a'n Kashmir-ah Pakistan sipai tir turin ngen

Pakistan firfiakten Mumbai khawpui an beihnaa a bultumtu bera puh, Jamaat-ud-Dawah hotu Hafiz Saeed-a chuan Pakistan Army Chief General Raheel Shariff-a hnenah Kashmir-a Pakistan sipai tir lut turin a ngen.

Karachi-a 'Defence Council of Pakistan' hminga rally huaihawtnaa thu a sawiah Saeed chuan, "India leh Pakistan inṭhenhran dawn khan Kashmir mipuite chuan Pakistan lama beh an duh thu an lo puang tawh a ni. Mahse ṭhenhran an nih hnuah pawh India chuan Jammu and Kashmir-ah a sipaite a dah lui reng a ni" a ti.

Saeed chuan India nena indo turin a ngen a ni lo tih a sawi a, mahse Prime Minister Nawaz Sharif leh Gen Raheel-te chuan Kashmir chungchangah hian kalphung thar an siam a ngai tih a sawi. Independence Day lawmnaah India Prime Minister Narendra Modi-a'n Kashmir leh Balochistan chungchang a sawichhuah pawh chhang let turin an PM Sharif chu a phut bawk.

"Pakistan chu indona tualzawlah a chang tawh a, Kashmir mipui pawisawilote thah an ni fo bawk a, hetihlai hian Modi-a chuan Balochistan lakhran chungchang a sawi a ni. Engvangin nge kan Prime Minister hi a ngawih reng a, Modi hi a chhan let ngam loh?" tiin Saeed chuan a sawi.

Hetihlai hian Kashmir tualchhung buaina thleng mekah, buaina tihpunlun zel a nih theih nan Pakistan lam aṭangin sum ṭhahnem tham tak thawnluh a ni ṭhin nia sawi a ni. NDTV in a tarlan danin, tualchhung buaina a chhuah hnu hian ramri kaltlangin Kashmir Valley-ah cheng vaibelchhe 24 vel zet thawnluh a ni tawh. Heng pawisa thawnluhte hi buaina chawk chhuak thar zel tura an hma lak nan, inlakhran duhtu pawl Dukhtranan-e-Millat leh Jammat-e-Islami hnenah pek an nih thu a tarlang.

Sorkar laipui chuan Kashmir tualchhung buaina thleng mekah Pakistan firfiak pawl, Lashkar-e-Toiba leh Jamaat-ud-Dawaah te chu inrawlhah a lo puh tawh bawk. LeT firfiak an man, Bahadur Ali chuan a inpuannaah, Pakistan-a firfiak pawlten training an pek thu leh, Kashmir-ah mipui lungawi lohna lantirna hmunah telin, security force-te bei tura tirh a nih thu a sawi.

Kashmir tualchhung buaina thleng vang hian ni 40 chhung curfew puan a ni tawh a, mipui nunphung pawh a tibuai tawh hle. Thawhlehni khan mipui leh security force-te inkarah buaina chhuak thar lehin, mi panga an thih belh leh a ni.