TN Speaker-in DMK MLA zawng zawng suspend

Tamil Nadu Assembly Speaker, P Dhanapal chuan nimin khan eptu pawl, DMK MLA 80 chuangte chu House aṭanga a chhuah tir bakah, kar khat chhung atan a suspend.

Nimina Assembly rorel inkhawmah hian House leader leh finance minister O Pannerselvam chuan DMK MLA zawng zawngte suspend-na tur resolution siam a rawt a, hei hi House chuan a pass zui a ni. Kar khat chhung rorel inkhawmah an tel thei dawn lo a, an thawhpui, MLA pariat nei Congress party erawh chu hrem tel an ni lo.

DMK MLA-te hian AIADMK MLA Gunasekarn-a'n an party hotu, MK Stalin-a'n May assembly inthlan neih hmaa state chhunga 'Namakku Naame' (mass contact programme) a neih chungchang a sawisel duh lohna lantirin House chhungah hian rorel thei loin buaina an siam a ni. House aṭanga hnawhchhuah an nih hnua chanchin thar lakhawmtute a kawmnaah, Stalin chuan an party hremna tur chu AIADMK sorkar chuan a hma aṭanga a lo ruahman lawk vek niin a sawi.

House chhunga DMK MLA-te an aubuai hnuah, Stalin hian an aiawha ngaihdam dil a inpeih thu sawi mah se, Speaker Dhanapal chuan ngaihdam a dil a nih chuan a MLA te a thunun theih loh zia a tilang chiang mai nia sawiin, a pawmsak lo a ni.