Jalgaon-a rel chesualah mi 13 an thi

Maharashtra-a Jalgaon district huam chhungah Nilaini, January 22, 2025 khan khualzin phur, Lucknow-Mumbai Pushpak Express rel a chesual a, mi 13 thiin mi dang15 an hliam bawk. Thite hi hmeichhia pali leh mipa pakua an ni.

Rel chesuala thi mi 13 zinga mi pariatte chu an nihna hriat tawh niin, Nepal mi pali an tel. Hliam tuar zinga mi 10-te chu Pachora Civil Hospital-ah enkawl an ni a, a bak mi pangate chu hliam tenau niin damdawi-in aṭangin chhuah tir an ni tawh.

Chetsualna thlenga thi chhungte leh hliam tuarte hnenah zangnadawmna pek an nih tur thu Railway Board chuan a sawi. Mitthi chhungte hnenah hian Rs nuai 1.5 ṭheuh pek an ni dawn a, hliam tuar na zualte hnenah Rs 50,000 leh hliam tenau deuhte hnenah Rs 5,000 ṭheuh pek an ni. Maharashtra sorkar chuan thi chhungte hnenah hian zangnadawmna Rs nuai 5 ṭheuh a pe dawn tih chief minister Devendra Fadnavis chuan a sawi bawk.

Rel chetsualna hi Pachora khaw bul, Maheji leh Paradhe station inkara thleng a ni. Khualzin phur Lucknow-Mumbai Pushpak Express-ah hian fire alarm tih rik palh a ni a, hei vang hian khualzin ṭhenkhat chu rel aṭang hian an bula rel kawngah an zuang chhuak a, hemi kawnga rel dang rawn tlan chuan a su hlum ta niin official-te chuan an sawi.