Kejriwal-a'n kum 5 chhungin Delhi-a hna neih lohna umbo tum

Delhi Assembly inthlan neih tur atan kar hnih chauh a awm tawh a, party hrang hrangte an campaign ngawrh tawh hle. Delhi-a rorellai, Aam Aadmi Party (AAP) national convener Arvind Kejriwal chuan Ningani khan kum nga chhungin ṭhalaite tan hna siamsak a, Delhi-a hnathawh tur awm lo, unemployment chu tih bo ngei a tum thu a sawi.

Video kaltlanga thu a sawinaah, Delhi CM hlui hian hnathawh tur buatsaih chungchangah a in sawrbing tur thu a sawi a, "Ka ngaihpawimawh hmasak ber tur chu ṭhalaite hnena hna thawh tur pek a ni a, kan team chuan hna thawh tur awm lohna sukiang turin ruahmanna an siam tawh a ni," a ti.

Kejriwal chuan AAP sorkar hnathawh dan tarlangin, Punjab-a AAP sorkar chuan kum hnih chhungin sorkar hna 48,000 ṭhalai tan a siam bakah, private sector lamah pawh ṭhalai tan hna thawh tur nuai thum chuang an chhawpchhuah sak thei niin a tarlang. " Kan thil tum hi langtlang leh dik tak niin, hna thawh tur ruahman dan kawng kan hria a, mipui thlawpna nen kum nga chhungin Delhi-ah hian hnathawh tur vang hi kan umbo thei a ni" tiin a sawi.

Delhi Assembly inthlan hi thla thar February 5 hian neih tura ruahman niin, in thlan result hi February 8 ah puan tum a ni. AAP hian a zawna a ṭum thumna atana hnehna chan tumin theihtawp an chhuah mek a, hetih lai hian BJP lam pawhin nasa takin hma an la ve mek bawk.