India ramah Covid-19 kai Nuai 50 an chuang tawh

Covid-19 hripui lengin India ram a run mek zel a, nimina sorkar report tihchhuah thlengin ramchhung hmun hrang hrangah hripui kai nuai 50 chuang an awm tawh a, mi sing riat chuangin thihpui tawhin nuai 39 chuang an dam leh tawh a, nuai kua chuangin hri an la kai mek a ni.

Nimina Ministry of Health and Family Welfare-in report an tihchhuahah chuan Thawhlehni khan hri kai hmuh chhuah thar mi 90,123 an awm leh a, nimin piah lama report an tihchhuah aiin hri kai hmuh chhuah thar an tam zawk. India ramah hri kai 50,20,359 an awm tawh.

Sorkar chuan darkar 24 chhungin dama puan 82,961 an awm leh tih tarlangin hei nen hian hri kai tawh zinga mi 39,42,360 chu an dam leh tawh tih tarlang a ni a, mi 1,120 lai darkar 24 chhungin hripui vangin an thi leh bawk. India ramah hian tunhnaiah report an tihchhuahah chuan nitin hri vanga thi sang chuang an awm a ni.

Hripui vanga thi tawh report zawng zawng chu 82,066 a ni a, 9,95,933-in hri an la kai mek a ni. 

Hri kai nuai 50 an awm tling ta a, hri kai tamna ber ram US-ah chuan nuai 67 chuangin an kai tawh tih Worldometer chuan tarlangin tun ang renga hri kai rate a pung chak a nih chuan thla khat liam hnuah US aiin India ramah hri kai hi an tam tawh zawk a rinawm. 

Positive rate chu 8.06% a ni tih sorkar chuan tarlangin enkawl dam tawh rate chu 78.52% a ni a, thihpui rate chu 1.63% a ni thung a, hri kai mek rate hi 19.84% a ni bawk.

Indian Council of Medical Research chuan nimina report an tihchhuahah sample 11,16,842 an endik leh tih an tarlang a, sample an endik tawh zawng zawng chu 5,94,29,115 a ni.

ICMR hian sample endikna tura laboratory pawmpui 1,736 a nei a, chung zinga 1,055 chu sorkar laboratory niin 681 chu private laboratory a ni thung.