Foreign Secretary in R-Day ah China pan dawn

Foreign Secretary Vikram Misri chuan Pathianni, January 26, hian Beijing a pan dawn. Line of Actual Control(LAC) chungchanga India leh China-in kum li chhung innghirnghona an lo neih tawhte tih tawp a, inremna kawng zawnga inbiakna neih chu an chhunzawm leh dawn a ni.

Meeting a neih tur hi nikum October 21-a LAC a buaina awmte tih reh tum a prime minister Narendra Modi leh China president Xi Jinping ten Russia a summit an hman a in biakna an neih leh, ram pahnih foreign minister leh defence minister te in biakna neihin a nghawng zel a ni. Thla hmasa khan national security advisor Ajit Doval leh China foreign minister Wang Yi te chu Beijing an in kawm tawh bawk.

Hun eng emaw chen chhung buaina a awm hnuin ram pahnih ten an inkara thawh dunna ṭha an neih theihna turin in biakna neih fo a lo ni tawh a ni. Tun tuma an inbiaknaah hian politics, economic, bakah ram pahniha mipuite inkar tih hmasawn a nih theihna turte sawi a nih tur thu External Affairs Ministry thuchhuah chuan a tarlang.

Inbiakna neih turah hian India leh China inkara direct flight service chhunzawmna tur pawh an sawi ang. Covid-19 hripui a len hnu khan ram pahnihte inkara direct service hi an ti tawp a, tun thlengin an la chhunzawm leh lo a ni. Hei bakah journalist leh sumdawng mi te tana visa pek chhuah leh te, sumdawnna huanga harsatna sutkian dan leh, Mansarovar Yatra sakhaw hmun thinghlim tlawh phalsak leh chungchang chu an sawiho tur zingah a tel bawk.