Delhi doctor 2,000 chuangin nawrh an huaihawt
Delhi-a doctor 2,000 chuang chuan nimin zing aṭang khan nawrh huaihawtin a huhoin chawlh an la a, mipuite'n harsatna an tawh phah nasa hle.
Delhi-a hospital 20-a doctor 2,000 chuangin nawrh hi an huaihawt a, an thil phut zingah hian an hnathawhna hmuna venhimna ṭha zawk pek te, tui thianghliam an mamawh ang zat pek leh, a hun taka an hlawh pek te a tel.
Nawrh huaihawt hi Safdarjung Hospital, Lady Hardinge Medical College, Maulana Azad Medical College leh Ram Manohar Lohia Hospital te pawhin an zawm a ni.
Doctor-te chuan an thil phut hi sorkarin a ngaihsak lo a, hei vang hian nawrh hmanga nawr an tum ta tih an sawi. An thil phut chungchangte enfiah sak tur hian Union Health Ministry hnenah pawh lehkha an lo thehlut tawh a ni.
Delhi Chief Minister Arvind Kejriwal-a chuan doctor rualte thil phut zinga a tam zawk chu thil tihawm tak nia a ngaih thu sawiin, Health Department hnenah ngaihven thuai turin a ngen. AAP hotu, Kejriwal-a chuan Delhi sorkarin mipuite tana inenkawlna ṭha pek a tum a ni tih sawiin, hemi kawnga pui tur hian doctor-te chu a sawm nghal bawk.
Hetihlai hian Delhi Health Minister Satyendar Jain chuan nawrh huaihawt chu buai chinfelna a ni lo tih sawiin, Pathianni khan doctor aiawhte hi a bia a, mahse inremna an siam thei lo tih a sawi. Minister chuan nawrh huaihawt mek, doctor-te hi inbiakna neihpui tura a la sawm reng thu a sawi.