Zu chhia vanga thi chhungte sorkarin a ral dawn

Maharashtra-a zu chhe in vanga thi chu Pathianni thleng khan mi 97 an tling tawh. State sorkar chuan zu chhia in vanga thi chhungte hi cheng nuai khat ṭheuhin a ral dawn.

Mumbai khawpui daia kar kalta Nilaini zana zu chhe in vanga thi hi 97 an tlin bakah, mi 40 chuang chu damdawi inah enkawl mek an la ni.

Pathianni khan State Edu­cation Minister leh Guardian Minis­ter of suburban Mumbai, Vinod Tawde chuan mitthi chhungte hi tlawhin, Chief Minister fund aṭangin ralna cheng nuai khat ṭheuh pek an nih tur thu a hrilh.

Police Crime Branch chuan zu chhe zuartute leh he thila inhnamhnawihte zawnchhuah tumin beihpui an thlak zui mek. Sorkar chuan he thil kaih­hnawihah hian police pariat-te chu an hna thawk ṭha loa puhin a suspend tawh a, an zingah hian senior police inspector Prakash Patil pawh a tel.