Karnataka sorkarin SC-ah Jaya-i a khing
Karnataka High Court-in eiruk thubuaia Tamil Nadu Chief Minister J Jayalilathaa-i thiam a chantirna chu Karnataka sorkar chuan Supreme Court-ah a khing let.
Tamil Nadu CM Jaya-i hi CM a nih term khatna, kum 1991-96 inkar chhunga a hausakna chu a sum lakluh nen inphu loa puhin, a lakah eiruk thubuai thehluh a ni. A thubuaiah hian Bengaluru trial court chuan thiam loh chantirin, kum li tang tur leh cheng vaibelchhe 100 chawi turin a hrem a ni. Mahse hei hi Karnataka High Court-ah khing letin, high court chuan eirua an puhna hi finfiahna ṭha tawk a awm lo tiin thiam a chantir a, a thubuai pawh hi a hlihsak leh vek a ni.
A thubuaia fihlim tir a nih hnuah, May 24 khan Jaya-i hi Tamil Nadu CM atan lakluh leh a ni.
Karnataka High Court chuan Jaya-i sum lakluh zat, trial court-in cheng vaibelchhe 53.6 nia a tarlan chu a dik lo a, cheng vaibelchhe 2.82 hu zawk a ni, a ti. Hei hi eirua puhna turin thu a tling tawk lo tiin a sawi bawk.
Mahse Karnataka sorkar chuan high court-in Jaya-i a fihlimtir dan hi a dik lo tiin, a hausakna a chhut danah pawh thil chhutsual a awm a ni, a ti. Hei vang hian Jaya-i eiruk thubuai hi ngaihtuah ṭha leh turin a ngen a ni.