Sister Nirmala a thi

Missionaries of Cha­rity hotu, Sister Nirmla Joshi (81) chu nimin khan New Delhi-ah a thi.

Kum 1997-a Mother Teresa a thih khan Sister Nirmala hian a ai awh chhoin, Missionaries of Charity hotu hna hi a chelh zui a ni. Kum 2009, April thlaa general chapter neihah Sister Nirmala theih loh huna a thlaktu atan Sister Mary Prema thlan a ni tawh bawk.

Sister Nirmala hi hun eng emaw chen liamta aṭang khan a hriselna a tha lo a, uluk taka enkawl ni mah se hniam lam a pan zel a, nimin zing khan a thi ta tih Charity official chuan a sawi. A ruang hi Kolkata-a Mother House-ah lak a ni dawn a, vawiin tlai dar 4 hian vui a ni ang.

Mother Teresa thih hma thla ruk, kum 1997 March 13 khan Sister Nirmala hi Missionaries of Charity-a Superior General atan thlan a ni.

Prime Minister Naren­dra Modi chuan Sister Nirmala chu mi rethei leh chanhaite tana a hun pum pe a thawktu a ni tiin, a ui thu a sawi. West Bengal Chief Minister Mamata Banerjee pawhin Sister Nirmala chu Kolkata leh khawvelin an ui hle a ni, a ti.