Yoga tih larna atan sorkarin Rs vbch 500 dah dawn

International Yoga Day chu Pathianni khan rampumah hman a ni a, sorkar laipui chuan yoga tihlar chhunzawm zelna atan hian cheng vaibelchhe 500 dah a tum.

Minister of State for Ayush, Shripad Naik chuan, "International Yoga Day kha a bul ṭanna chauh a ni. Yoga hi ramchhung hmun kilkhawr berah pawh hmelhriattir zel kan tum a, hemi atan hian infrastructure, facility leh research neihte a ngai ang. Ayush ministry chuan ruahmanna a siam mek a, cheng vaibelchhe 500 vel a ngai dawn a ni," a ti.

Ministry hian yoga chawilar dan turte ngaihtuah turin special task force a din tawh bawk. He committee hi yoga guru, Swami Vivekananda Yoga Anusandhana Samasthana-a chancellor HR Nagendra-a'n a ho a, September thla hian rawtna an neihte sorkarah an thehlut ang. Nagendra hi Prime Minister Modi-a personal yoga guru nilai a ni bawk.

Sorkar laipui chuan yoga kalpui zel dan tur hi a ngaihtuah mek a, ruahmanna a siamah chuan university hrang hrangah yoga bika diploma, under graduate leh post graduate course dah dan turte pawh a tel. Hei bakah hian yoga pual bika institute leh college din chungchang pawh sorkar chuan a ngaihtuah mek a ni.

Ramchhunga college 50 velah yoga course hi kalpui mek a ni, mahse course kalpui danah hian ruahmanna mumal taka siam a la awm lo.