Lalit Modi-a'n Finance Minister a bei

Indian Premier Lea­gue (IPL) chairman hlui, dan bawhchhia leh sum tam tak tihchinpena puh, Lalit Modi chuan Pa­thianni khan Union Finance Minister Arun Jaitley leh senior poli­tician dangte a bei.

Sorkar hmasa, UPA sorkar khan Lalit Modi hi thubuai a siamsak a, a passport pawh a hreksak bawk. Thubuai siamsak a nih hnu hian Modi hi England-ah tlanchhiain, tun thlengin a la khawsa a ni. England chhuahsan lo tura tih a nih hnuah, Modi hian Portugal-a a nupui zainaa tel tumin thu­neitute hnenah tra­vel document a dil a ni. Zin chhuah a dilnaah hian BJP hruaitu hlun pahnihin, Ex­ternal Affairs Minister Sushma Swaraj-i leh Rajasthan Chief Minister Vasundhara Raje-te chuan an ṭanpui a, hemi chungchang hian buaipui a hlawh zui hle.

Pathianni khan La­lit Modi hian a twit­ter hmangin senior poli­ti­cian-te hi a bei a, Finance Minister bakah hian Cong­­ress hruaitu senior-te a bei tel a ni.

Minister Arun Jaitley chu Delhi & District Cric­ket Association (DDCA) buainaa in­hnam­hnawihah puhin, Modi chuan Jaitley hi a phone record-te puangzar turin a phut. Amah an puhna chungchangah hrem ngai a nih chuan eng hremna pawh dawn a hreh loh thu a sawi a, hemi rual hian politics hmanga innawrna vang chuan tlawm mai a tum loh thu a sawi.