Doctor nuarte lakah ESMA lekkawh
Delhi sorkar chuan Delhi khawpuia nawrh huaihawt, resident doctor 15,000-te chu nawrh tihtawp tura a hriattir hnuah thupek zawm lote lakah Essential Services Maintenance Act (ESMA) a lekkawh nghal.
Doctor-te hian sorkar laka an thil phut hrang hrangte tihhlawhtlin phutin Thawhṭanni aṭang khan a huhoin chawlh an la a, hei vang hian damlote'n an tawrh phah nasa hle. Nawrh hi hospital 20-a thawk doctor-te'n an zawm a, an zingah han central sorkar, Delhi sorkar leh municipal corporations enkawl hospital-a thawkte pawh an tel. An thil phut zingah hian an hnathawhna hmuna venhimna ṭha zawk pek te, an duty hun bithliah fel leh a hun taka an hlawh pekte a tel.
Delhi sorkar chuan Thawhṭanni khan Delhi Secretariat-ah dcotor aiawhte hi darkar hnih chhung meeting a neihpui a, an thil phut hrang hrangte a pawmsak thu a sawi. Hemi hnu hian doctor-te hi an nawrh tihtawp tura ngenin, nimin chawhma dar 11 thleng khan hun a pe a ni. Sorkar chuan hun pek chhunga an hna zawm duh lo a, nawrh huaihawt chhunzawmte lakah chuan ESMA hi lekkawhin, an laka action lak a nih tur thu a sawi.